【夜空下的小北斗】
晚上11：00，我，靜靜坐喺肥媽床邊，陪佢邊聽收音機，邊慢慢滴奶。
每日返工九個幾鐘，放工嚟到肥媽度，其實已經好攰；有時搭地鐵企喺度恰著咗，個頭樁呀樁，差啲樁咗喺地下！
晚上7：30，嚟到院舍，見到肥媽，即刻醒哂！
邊同佢傾偈，邊幫佢換片、洗口、洗臉、摺衫、換鼻貼、俾藥或營養品，攪足一個鐘！
坐低唞唔夠一個鐘，食幾粒魚蛋或零食頂肚，晚上9：30，幫肥媽沖涼，換枕套被舖。
晚上10：15，上第四餐奶，肥媽不停咳，我不停幫佢抹口水。
晚上11：15，上完奶，洗完針筒奶壼，輪到我食晚餐。
一係貢丸魚蛋，一係幾塊餅乾，飲杯熱華田，攪掂！
凌晨12：15，幫肥媽換片、搽cream、搽潤唇膏。
凌晨12：45，趕搭尾班車…
返屋企途中，有時又只剩返半對眼！
凌晨1：20，返到屋企，見到大咪小咪，又即刻醒哂！
換水機水、餵貓、煲水、洗衫、晾衫…
凌晨2：45，抱住大咪入睡，投入另一國度…
日唞生活咁辛苦，如果能夠喺夢中補償就好！
只可惜，每晚瞓唔夠四個鐘、每晚都會發夢嘅我，夢境完全係現實生活翻版，有時仲要加啲驚心動魄！
早上6：30起身，新一日又再展開，劇情又重覆發展…
但原來能夠重覆，已經算係福氣！
因為，穩定勝於一切…
朋友，你明白嘛？
Search